白頭毛

白頭毛

每一改發覺時間愈行愈緊，

袂赴適應的頭鬃著急甲有時白，

你染一个佮黃昏相像的頭毛，

親像葉仔飄落的模樣，

對著流水跋一个銀角仔下願。

只是願望共你的青春借走，

敢會是仝一个時陣？

橫直忝矣，蝶仔迷路嘛是媠，

佮天頂的紙飛行機仝款，

想欲飛去閣較遠的所在，

聽蟬仔唱囡仔歌。

白頭毛倚佇鬢邊，

有時仔聽著雷聲，有時仔沃著雨，

就算講烏雲經過，

白翎鷥嘛會倚來開講。

會記得曝月光的時陣愛微微仔笑，

星仔若是對你(目聶)目，

愛溫柔的感覺家己，

夢若愈媠著愛愈清醒，

等待春天來的時陣親像風。